ଶ୍ୟାମଲାଦଣ୍ଡକଂ କାଲିଦାସବିରଚିତମ୍
॥ ଅଥ ଶ୍ୟାମଲା ଦଣ୍ଡକମ୍ ॥
॥ ଧ୍ୟାନମ୍ ॥
ମାଣିକ୍ୟବୀଣାମୁପଲାଲୟନ୍ତୀଂ
ମଦାଲସାଂ ମଞ୍ଜୁଲବାଗ୍ୱିଲାସାମ୍ ।
ମାହେନ୍ଦ୍ରନୀଲଦ୍ୟୁତିକୋମଲାଙ୍ଗୀଂ
ମାତଙ୍ଗକନ୍ୟାଂ ମନସା ସ୍ମରାମି ॥ ୧॥
ଚତୁର୍ଭୁଜେ ଚନ୍ଦ୍ରକଲାବତଂସେ
କୁଚୋନ୍ନତେ କୁଙ୍କୁମରାଗଶୋଣେ ।
ପୁଣ୍ଡ୍ରେକ୍ଷୁପାଶାଙ୍କୁଶପୁଷ୍ପବାଣ-
ହସ୍ତେ ନମସ୍ତେ ଜଗଦେକମାତଃ ॥ ୨॥
॥ ବିନିୟୋଗଃ ॥
ମାତା ମରକତଶ୍ୟାମା ମାତଙ୍ଗୀ ମଦଶାଲିନୀ ।
କୁର୍ୟାତ୍ କଟାକ୍ଷଂ କଲ୍ୟାଣୀ କଦଂବବନବାସିନୀ ॥ ୩॥
॥ ସ୍ତୁତି ॥
ଜୟ ମାତଙ୍ଗତନୟେ ଜୟ ନୀଲୋତ୍ପଲଦ୍ୟୁତେ ।
ଜୟ ସଙ୍ଗୀତରସିକେ ଜୟ ଲୀଲାଶୁକପ୍ରିୟେ ॥ ୪॥
॥ ଦଣ୍ଡକମ୍ ॥
ଜୟ ଜନନି ସୁଧାସମୁଦ୍ରାନ୍ତରୁଦ୍ୟନ୍ମଣୀଦ୍ୱୀପସଂରୂଢ୍ -
ବିଲ୍ୱାଟବୀମଧ୍ୟକଲ୍ପଦ୍ରୁମାକଲ୍ପକାଦଂବକାନ୍ତାରବାସପ୍ରିୟେ
କୃତ୍ତିବାସପ୍ରିୟେ ସର୍ୱଲୋକପ୍ରିୟେ
ସାଦରାରବ୍ଧସଂଗୀତସଂଭାବନାସଂଭ୍ରମାଲୋଲ-
ନୀପସ୍ରଗାବଦ୍ଧଚୂଲୀସନାଥତ୍ରିକେ ସାନୁମତ୍ପୁତ୍ରିକେ
ଶେଖରୀଭୂତଶୀତାଂଶୁରେଖାମୟୂଖାବଲୀବଦ୍ଧ-
ସୁସ୍ନିଗ୍ଧନୀଲାଲକଶ୍ରେଣିଶୃଙ୍ଗାରିତେ ଲୋକସଂଭାବିତେ
କାମଲୀଲାଧନୁସ୍ସନ୍ନିଭଭ୍ରୂଲତାପୁଷ୍ପସନ୍ଦୋହସନ୍ଦେହକୃଲ୍ଲୋଚନେ
ବାକ୍ସୁଧାସେଚନେ ଚାରୁଗୋରୋଚନାପଙ୍କକେଲୀଲଲାମାଭିରାମେ ସୁରାମେ ରମେ
ପ୍ରୋଲ୍ଲସଦ୍ଧ୍ୱାଲିକାମୌକ୍ତିକଶ୍ରେଣିକାଚନ୍ଦ୍ରିକାମଣ୍ଡଲୋଦ୍ଭାସି
ଲାବଣ୍ୟଗଣ୍ଡସ୍ଥଲନ୍ୟସ୍ତକସ୍ତୂରିକାପତ୍ରରେଖାସମୁଦ୍ଭୂତସୌରଭ୍ୟ-
ସଂଭ୍ରାନ୍ତଭୃଙ୍ଗାଙ୍ଗନାଗୀତସାନ୍ଦ୍ରୀଭବନ୍ମନ୍ଦ୍ରତନ୍ତ୍ରୀସ୍ୱରେ
ସୁସ୍ୱରେ ଭାସ୍ୱରେ
ବଲ୍ଲକୀବାଦନପ୍ରକ୍ରିୟାଲୋଲତାଲୀଦଲାବଦ୍ଧ-
ତାଟଙ୍କଭୂଷାବିଶେଷାନ୍ୱିତେ ସିଦ୍ଧସମ୍ମାନିତେ
ଦିବ୍ୟହାଲାମଦୋଦ୍ୱେଲହେଲାଲସଚ୍ଚକ୍ଷୁରାନ୍ଦୋଲନଶ୍ରୀସମାକ୍ଷିପ୍ତକର୍ଣୈକ-
ନୀଲୋତ୍ପଲେ ଶ୍ୟାମଲେ ପୂରିତାଶେଷଲୋକାଭିବାଞ୍ଛାଫଲେ ଶ୍ରୀଫଲେ
ସ୍ୱେଦବିନ୍ଦୂଲ୍ଲସଦ୍ଫାଲଲାବଣ୍ୟ ନିଷ୍ୟନ୍ଦସନ୍ଦୋହସନ୍ଦେହକୃନ୍ନାସିକାମୌକ୍ତିକେ
ସର୍ୱବିଶ୍ୱାତ୍ମିକେ ସର୍ୱସିଦ୍ଧ୍ୟାତ୍ମିକେ କାଲିକେ ମୁଗ୍ଦ୍ଧମନ୍ଦସ୍ମିତୋଦାରବକ୍ତ୍ର-
ସ୍ଫୁରତ୍ ପୂଗତାମ୍ବୂଲକର୍ପୂରଖଣ୍ଡୋତ୍କରେ ଜ୍ଞାନମୁଦ୍ରାକରେ ସର୍ୱସମ୍ପତ୍କରେ
ପଦ୍ମଭାସ୍ୱତ୍କରେ ଶ୍ରୀକରେ
କୁନ୍ଦପୁଷ୍ପଦ୍ୟୁତିସ୍ନିଗ୍ଧଦନ୍ତାବଲୀନିର୍ମଲାଲୋଲକଲ୍ଲୋଲସମ୍ମେଲନ
ସ୍ମେରଶୋଣାଧରେ ଚାରୁବୀଣାଧରେ ପକ୍ୱବିଂବାଧରେ
ସୁଲଲିତ ନବୟୌବନାରଂଭଚନ୍ଦ୍ରୋଦୟୋଦ୍ୱେଲଲାବଣ୍ୟଦୁଗ୍ଧାର୍ଣବାବିର୍ଭବତ୍
କମ୍ବୁବିମ୍ବୋକଭୃତ୍କନ୍ଥରେ ସତ୍କଲାମନ୍ଦିରେ ମନ୍ଥରେ
ଦିବ୍ୟରତ୍ନପ୍ରଭାବନ୍ଧୁରଚ୍ଛନ୍ନହାରାଦିଭୂଷାସମୁଦ୍ୟୋତମାନାନବଦ୍ୟାଙ୍ଗ-
ଶୋଭେ ଶୁଭେ
ରତ୍ନକେୟୂରରଶ୍ମିଚ୍ଛଟାପଲ୍ଲବପ୍ରୋଲ୍ଲସଦ୍ଦୋଲ୍ଲତାରାଜିତେ ଯୋଗିଭିଃ
ପୂଜିତେ ବିଶ୍ୱଦିଙ୍ମଣ୍ଡଲବ୍ୟାପ୍ତମାଣିକ୍ୟତେଜସ୍ସ୍ଫୁରତ୍କଙ୍କଣାଲଂକୃତେ
ବିଭ୍ରମାଲଂକୃତେ ସାଧୁଭିଃ ପୂଜିତେ ବାସରାରଂଭବେଲାସମୁଜ୍ଜୃମ୍ଭ
ମାଣାରବିନ୍ଦପ୍ରତିଦ୍ୱନ୍ଦ୍ୱିପାଣିଦ୍ୱୟେ ସନ୍ତତୋଦ୍ୟଦ୍ଦୟେ ଅଦ୍ୱୟେ
ଦିବ୍ୟରତ୍ନୋର୍ମିକାଦୀଧିତିସ୍ତୋମସନ୍ଧ୍ୟାୟମାନାଙ୍ଗୁଲୀପଲ୍ଲବୋଦ୍ୟ
ନ୍ନଖେନ୍ଦୁପ୍ରଭାମଣ୍ଡଲେ ସନ୍ନୁତାଖଣ୍ଡଲେ ଚିତ୍ପ୍ରଭାମଣ୍ଡଲେ ପ୍ରୋଲ୍ଲସତ୍କୁଣ୍ଡଲେ
ତାରକାରାଜିନୀକାଶହାରାବଲିସ୍ମେର ଚାରୁସ୍ତନାଭୋଗଭାରାନମନ୍ମଧ୍ୟ-
ବଲ୍ଲୀବଲିଚ୍ଛେଦ ବୀଚୀସମୁଦ୍ୟତ୍ସମୁଲ୍ଲାସସନ୍ଦର୍ଶିତାକାରସୌନ୍ଦର୍ୟରତ୍ନାକରେ
ବଲ୍ଲକୀଭୃତ୍କରେ କିଙ୍କରଶ୍ରୀକରେ
ହେମକୁଂଭୋପମୋତ୍ତୁଙ୍ଗ ବକ୍ଷୋଜଭାରାବନମ୍ରେ ତ୍ରିଲୋକାବନମ୍ରେ
ଲସଦ୍ୱୃତ୍ତଗଂଭୀର ନାଭୀସରସ୍ତୀରଶୈବାଲଶଙ୍କାକରଶ୍ୟାମରୋମାବଲୀଭୂଷଣେ
ମଞ୍ଜୁସଂଭାଷଣେ
ଚାରୁଶିଞ୍ଚତ୍କଟୀସୂତ୍ରନିର୍ଭତ୍ସିତାନଙ୍ଗଲୀଲଧନୁଶ୍ଶିଞ୍ଚିନୀଡଂବରେ
ଦିବ୍ୟରତ୍ନାମ୍ବରେ
ପଦ୍ମରାଗୋଲ୍ଲସ ନ୍ମେଖଲାମୌକ୍ତିକଶ୍ରୋଣିଶୋଭାଜିତସ୍ୱର୍ଣଭୂଭୃତ୍ତଲେ
ଚନ୍ଦ୍ରିକାଶୀତଲେ ବିକସିତନବକିଂଶୁକାତାମ୍ରଦିବ୍ୟାଂଶୁକଚ୍ଛନ୍ନ
ଚାରୂରୁଶୋଭାପରାଭୂତସିନ୍ଦୂରଶୋଣାୟମାନେନ୍ଦ୍ରମାତଙ୍ଗ
ହସ୍ମାର୍ଗ୍ଗଲେ ବୈଭବାନର୍ଗ୍ଗଲେ ଶ୍ୟାମଲେ କୋମଲସ୍ନିଗ୍ଦ୍ଧ
ନୀଲୋତ୍ପଲୋତ୍ପାଦିତାନଙ୍ଗତୂଣୀରଶଙ୍କାକରୋଦାର
ଜଂଘାଲତେ ଚାରୁଲୀଲାଗତେ ନମ୍ରଦିକ୍ପାଲସୀମନ୍ତିନୀ
କୁନ୍ତଲସ୍ନିଗ୍ଦ୍ଧନୀଲପ୍ରଭାପୁଞ୍ଚସଞ୍ଜାତଦୁର୍ୱାଙ୍କୁରାଶଙ୍କ
ସାରଂଗସଂୟୋଗରିଂଖନ୍ନଖେନ୍ଦୂଜ୍ଜ୍ୱଲେ ପ୍ରୋଜ୍ଜ୍ୱଲେ
ନିର୍ମଲେ ପ୍ରହ୍ୱ ଦେବେଶ ଲକ୍ଷ୍ମୀଶ ଭୂତେଶ ତୋୟେଶ ବାଣୀଶ କୀନାଶ
ଦୈତ୍ୟେଶ ଯକ୍ଷେଶ ବାୟ୍ୱଗ୍ନିକୋଟୀରମାଣିକ୍ୟ ସଂହୃଷ୍ଟବାଲାତପୋଦ୍ଦାମ--
ଲାକ୍ଷାରସାରୁଣ୍ୟତାରୁଣ୍ୟ ଲକ୍ଷ୍ମୀଗୃହିତାଙ୍ଘ୍ରିପଦ୍ମ୍ମେ ସୁପଦ୍ମେ ଉମେ
ସୁରୁଚିରନବରତ୍ନପୀଠସ୍ଥିତେ ସୁସ୍ଥିତେ
ରତ୍ନପଦ୍ମାସନେ ରତ୍ନସିମ୍ହାସନେ ଶଙ୍ଖପଦ୍ମଦ୍ୱୟୋପାଶ୍ରିତେ ବିଶ୍ରୁତେ
ତତ୍ର ବିଘ୍ନେଶଦୁର୍ଗାବଟୁକ୍ଷେତ୍ରପାଲୈର୍ୟୁତେ ମତ୍ତମାତଙ୍ଗ
କନ୍ୟାସମୂହାନ୍ୱିତେ ଭୈରବୈରଷ୍ଟଭିର୍ୱେଷ୍ଟିତେ
ମଞ୍ଚୁଲାମେନକାଦ୍ୟଙ୍ଗନାମାନିତେ ଦେବି ବାମାଦିଭିଃ ଶକ୍ତିଭିସ୍ସେବିତେ
ଧାତ୍ରି ଲକ୍ଷ୍ମ୍ୟାଦିଶକ୍ତ୍ୟଷ୍ଟକୈଃ ସଂୟୁତେ ମାତୃକାମଣ୍ଡଲୈର୍ମଣ୍ଡିତେ
ଯକ୍ଷଗନ୍ଧର୍ୱସିଦ୍ଧାଙ୍ଗନା ମଣ୍ଡଲୈରର୍ଚିତେ
ଭୈରବୀ ସଂବୃତେ ପଞ୍ଚବାଣାତ୍ମିକେ ପଞ୍ଚବାଣେନ ରତ୍ୟା ଚ
ସଂଭାବିତେ ପ୍ରୀତିଭାଜା ବସନ୍ତେନ ଚାନନ୍ଦିତେ ଭକ୍ତିଭାଜଂ ପରଂ ଶ୍ରେୟସେ
କଲ୍ପସେ ଯୋଗିନାଂ ମାନସେ ଦ୍ୟୋତସେ ଛନ୍ଦସାମୋଜସା ଭ୍ରାଜସେ ଗୀତବିଦ୍ୟା
ବିନୋଦାତି ତୃଷ୍ଣେନ କୃଷ୍ଣେନ ସମ୍ପୂଜ୍ୟସେ ଭକ୍ତିମଚ୍ଚେତସା ବେଧସା
ସ୍ତୂୟସେ ବିଶ୍ୱହୃଦ୍ୟେନ ବାଦ୍ୟେନ ବିଦ୍ୟାଧରୈର୍ଗୀୟସେ
ଶ୍ରବଣହରଦକ୍ଷିଣକ୍ୱାଣୟା ବୀଣୟା କିନ୍ନରୈର୍ଗୀୟସେ
ଯକ୍ଷଗନ୍ଧର୍ୱସିଦ୍ଧାଙ୍ଗନା ମଣ୍ଡଲୈରର୍ଚ୍ୟସେ
ସର୍ୱସୌଭାଗ୍ୟବାଞ୍ଛାବତୀଭିର୍ ବଧୂଭିସ୍ସୁରାଣାଂ ସମାରାଧ୍ୟସେ
ସର୍ୱବିଦ୍ୟାବିଶେଷତ୍ମକଂ ଚାଟୁଗାଥା ସମୁଚ୍ଚାରଣାକଣ୍ଠମୂଲୋଲ୍ଲସଦ୍-
ବର୍ଣରାଜିତ୍ରୟଂ କୋମଲଶ୍ୟାମଲୋଦାରପକ୍ଷଦ୍ୱୟଂ ତୁଣ୍ଡଶୋଭାତିଦୂରୀଭବତ୍
କିଂଶୁକଂ ତଂ ଶୁକଂ ଲାଲୟନ୍ତୀ ପରିକ୍ରୀଡସେ
ପାଣିପଦ୍ମଦ୍ୱୟେନାକ୍ଷମାଲାମପି ସ୍ଫାଟିକୀଂ ଜ୍ଞାନସାରାତ୍ମକଂ var ମାଲାଗୁଣ
ପୁସ୍ତକଞ୍ଚଙ୍କୁଶଂ ପାଶମାବିଭ୍ରତୀ ତେନ ସଞ୍ଚିନ୍ତ୍ୟସେ ତସ୍ୟ
ବକ୍ତ୍ରାନ୍ତରାତ୍ ଗଦ୍ୟପଦ୍ୟାତ୍ମିକା ଭାରତୀ ନିସ୍ସରେତ୍ ଯେନ ବାଧ୍ୱଂସନାଦା
କୃତିର୍ଭାବ୍ୟସେ ତସ୍ୟ ବଶ୍ୟା ଭବନ୍ତିସ୍ତିୟଃ ପୂରୁଷାଃ ଯେନ ବା
ଶାତକଂବଦ୍ୟୁତିର୍ଭାବ୍ୟସେ ସୋଽପି ଲକ୍ଷ୍ମୀସହସ୍ରୈଃ ପରିକ୍ରୀଡତେ
କିନ୍ନ ସିଦ୍ଧ୍ୟେଦ୍ୱପୁଃ ଶ୍ୟାମଲଂ କୋମଲଂ ଚନ୍ଦ୍ରଚୂଡାନ୍ୱିତଂ
ତାବକଂ ଧ୍ୟାୟତଃ ତସ୍ୟ ଲୀଲା ସରୋବାରିଧୀଃ ତସ୍ୟ କେଲୀବନଂ
ନନ୍ଦନଂ ତସ୍ୟ ଭଦ୍ରାସନଂ ଭୂତଲଂ ତସ୍ୟ ଗୀର୍ଦେବତା କିଙ୍କରି
ତସ୍ୟ ଚାଜ୍ଞାକରୀ ଶ୍ରୀ ସ୍ୱୟଂ
ସର୍ୱତୀର୍ଥାତ୍ମିକେ ସର୍ୱ ମନ୍ତ୍ରାତ୍ମିକେ
ସର୍ୱ ଯନ୍ତ୍ରାତ୍ମିକେ ସର୍ୱ ତନ୍ତ୍ରାତ୍ମିକେ
ସର୍ୱ ଚକ୍ରାତ୍ମିକେ ସର୍ୱ ଶକ୍ତ୍ୟାତ୍ମିକେ
ସର୍ୱ ପୀଠାତ୍ମିକେ ସର୍ୱ ବେଦାତ୍ମିକେ
ସର୍ୱ ବିଦ୍ୟାତ୍ମିକେ ସର୍ୱ ଯୋଗାତ୍ମିକେ
ସର୍ୱ ବର୍ଣାତ୍ମିକେ ସର୍ୱଗୀତାତ୍ମିକେ
ସର୍ୱ ନାଦାତ୍ମିକେ ସର୍ୱ ଶବ୍ଦାତ୍ମିକେ
ସର୍ୱ ବିଶ୍ୱାତ୍ମିକେ ସର୍ୱ ବର୍ଗାତ୍ମିକେ
ସର୍ୱ ସର୍ୱାତ୍ମିକେ ସର୍ୱଗେ ସର୍ୱ ରୂପେ
ଜଗନ୍ମାତୃକେ ପାହି ମାଂ ପାହି ମାଂ ପାହି ମାଂ
ଦେବି ତୁଭ୍ୟଂ ନମୋ ଦେବି ତୁଭ୍ୟଂ ନମୋ ଦେବି ତୁଭ୍ୟଂ ନମୋ
ଦେବି ତୁଭ୍ୟଂ ନମଃ
॥ ଇତି ଶ୍ୟାମଲା ଦଣ୍ଡକମ୍ ସମ୍ପୂର୍ଣମ୍ ॥
Comments
Post a Comment