শ্যামলাদণ্ডকং কালিদাসবিরচিতম্
॥ অথ শ্যামলা দণ্ডকম্ ॥
॥ ধ্যানম্ ॥
মাণিক্যবীণামুপলালয়ন্তীং
মদালসাং মঞ্জুলবাগ্বিলাসাম্ ।
মাহেন্দ্রনীলদ্যুতিকোমলাঙ্গীং
মাতঙ্গকন্যাং মনসা স্মরামি ॥ ১॥
চতুর্ভুজে চন্দ্রকলাবতংসে
কুচোন্নতে কুঙ্কুমরাগশোণে ।
পুণ্ড্রেক্ষুপাশাঙ্কুশপুষ্পবাণ-
হস্তে নমস্তে জগদেকমাতঃ ॥ ২॥
॥ বিনিয়োগঃ ॥
মাতা মরকতশ্যামা মাতঙ্গী মদশালিনী ।
কুর্যাৎ কটাক্ষং কল্যাণী কদংববনবাসিনী ॥ ৩॥
॥ স্তুতি ॥
জয় মাতঙ্গতনয়ে জয় নীলোৎপলদ্যুতে ।
জয় সঙ্গীতরসিকে জয় লীলাশুকপ্রিয়ে ॥ ৪॥
॥ দণ্ডকম্ ॥
জয় জননি সুধাসমুদ্রান্তরুদ্যন্মণীদ্বীপসংরূঢ্ -
বিল্বাটবীমধ্যকল্পদ্রুমাকল্পকাদংবকান্তারবাসপ্রিয়ে
কৃত্তিবাসপ্রিয়ে সর্বলোকপ্রিয়ে
সাদরারব্ধসংগীতসংভাবনাসংভ্রমালোল-
নীপস্রগাবদ্ধচূলীসনাথত্রিকে সানুমৎপুত্রিকে
শেখরীভূতশীতাংশুরেখাময়ূখাবলীবদ্ধ-
সুস্নিগ্ধনীলালকশ্রেণিশৃঙ্গারিতে লোকসংভাবিতে
কামলীলাধনুস্সন্নিভভ্রূলতাপুষ্পসন্দোহসন্দেহকৃল্লোচনে
বাক্সুধাসেচনে চারুগোরোচনাপঙ্ককেলীললামাভিরামে সুরামে রমে
প্রোল্লসদ্ধ্বালিকামৌক্তিকশ্রেণিকাচন্দ্রিকামণ্ডলোদ্ভাসি
লাবণ্যগণ্ডস্থলন্যস্তকস্তূরিকাপত্ররেখাসমুদ্ভূতসৌরভ্য-
সংভ্রান্তভৃঙ্গাঙ্গনাগীতসান্দ্রীভবন্মন্দ্রতন্ত্রীস্বরে
সুস্বরে ভাস্বরে
বল্লকীবাদনপ্রক্রিয়ালোলতালীদলাবদ্ধ-
তাটঙ্কভূষাবিশেষান্বিতে সিদ্ধসম্মানিতে
দিব্যহালামদোদ্বেলহেলালসচ্চক্ষুরান্দোলনশ্রীসমাক্ষিপ্তকর্ণৈক-
নীলোৎপলে শ্যামলে পূরিতাশেষলোকাভিবাঞ্ছাফলে শ্রীফলে
স্বেদবিন্দূল্লসদ্ফাললাবণ্য নিষ্যন্দসন্দোহসন্দেহকৃন্নাসিকামৌক্তিকে
সর্ববিশ্বাত্মিকে সর্বসিদ্ধ্যাত্মিকে কালিকে মুগ্দ্ধমন্দস্মিতোদারবক্ত্র-
স্ফুরৎ পূগতাম্বূলকর্পূরখণ্ডোৎকরে জ্ঞানমুদ্রাকরে সর্বসম্পৎকরে
পদ্মভাস্বৎকরে শ্রীকরে
কুন্দপুষ্পদ্যুতিস্নিগ্ধদন্তাবলীনির্মলালোলকল্লোলসম্মেলন
স্মেরশোণাধরে চারুবীণাধরে পক্ববিংবাধরে
সুললিত নবয়ৌবনারংভচন্দ্রোদয়োদ্বেললাবণ্যদুগ্ধার্ণবাবির্ভবৎ
কম্বুবিম্বোকভৃৎকন্থরে সৎকলামন্দিরে মন্থরে
দিব্যরত্নপ্রভাবন্ধুরচ্ছন্নহারাদিভূষাসমুদ্যোতমানানবদ্যাঙ্গ-
শোভে শুভে
রত্নকেয়ূররশ্মিচ্ছটাপল্লবপ্রোল্লসদ্দোল্লতারাজিতে যোগিভিঃ
পূজিতে বিশ্বদিঙ্মণ্ডলব্যাপ্তমাণিক্যতেজস্স্ফুরৎকঙ্কণালংকৃতে
বিভ্রমালংকৃতে সাধুভিঃ পূজিতে বাসরারংভবেলাসমুজ্জৃম্ভ
মাণারবিন্দপ্রতিদ্বন্দ্বিপাণিদ্বয়ে সন্ততোদ্যদ্দয়ে অদ্বয়ে
দিব্যরত্নোর্মিকাদীধিতিস্তোমসন্ধ্যায়মানাঙ্গুলীপল্লবোদ্য
ন্নখেন্দুপ্রভামণ্ডলে সন্নুতাখণ্ডলে চিৎপ্রভামণ্ডলে প্রোল্লসৎকুণ্ডলে
তারকারাজিনীকাশহারাবলিস্মের চারুস্তনাভোগভারানমন্মধ্য-
বল্লীবলিচ্ছেদ বীচীসমুদ্যৎসমুল্লাসসন্দর্শিতাকারসৌন্দর্যরত্নাকরে
বল্লকীভৃৎকরে কিঙ্করশ্রীকরে
হেমকুংভোপমোত্তুঙ্গ বক্ষোজভারাবনম্রে ত্রিলোকাবনম্রে
লসদ্বৃত্তগংভীর নাভীসরস্তীরশৈবালশঙ্কাকরশ্যামরোমাবলীভূষণে
মঞ্জুসংভাষণে
চারুশিঞ্চৎকটীসূত্রনির্ভৎসিতানঙ্গলীলধনুশ্শিঞ্চিনীডংবরে
দিব্যরত্নাম্বরে
পদ্মরাগোল্লস ন্মেখলামৌক্তিকশ্রোণিশোভাজিতস্বর্ণভূভৃত্তলে
চন্দ্রিকাশীতলে বিকসিতনবকিংশুকাতাম্রদিব্যাংশুকচ্ছন্ন
চারূরুশোভাপরাভূতসিন্দূরশোণায়মানেন্দ্রমাতঙ্গ
হস্মার্গ্গলে বৈভবানর্গ্গলে শ্যামলে কোমলস্নিগ্দ্ধ
নীলোৎপলোৎপাদিতানঙ্গতূণীরশঙ্কাকরোদার
জংঘালতে চারুলীলাগতে নম্রদিক্পালসীমন্তিনী
কুন্তলস্নিগ্দ্ধনীলপ্রভাপুঞ্চসঞ্জাতদুর্বাঙ্কুরাশঙ্ক
সারংগসংয়োগরিংখন্নখেন্দূজ্জ্বলে প্রোজ্জ্বলে
নির্মলে প্রহ্ব দেবেশ লক্ষ্মীশ ভূতেশ তোয়েশ বাণীশ কীনাশ
দৈত্যেশ যক্ষেশ বায়্বগ্নিকোটীরমাণিক্য সংহৃষ্টবালাতপোদ্দাম--
লাক্ষারসারুণ্যতারুণ্য লক্ষ্মীগৃহিতাঙ্ঘ্রিপদ্ম্মে সুপদ্মে উমে
সুরুচিরনবরত্নপীঠস্থিতে সুস্থিতে
রত্নপদ্মাসনে রত্নসিম্হাসনে শঙ্খপদ্মদ্বয়োপাশ্রিতে বিশ্রুতে
তত্র বিঘ্নেশদুর্গাবটুক্ষেত্রপালৈর্যুতে মত্তমাতঙ্গ
কন্যাসমূহান্বিতে ভৈরবৈরষ্টভির্বেষ্টিতে
মঞ্চুলামেনকাদ্যঙ্গনামানিতে দেবি বামাদিভিঃ শক্তিভিস্সেবিতে
ধাত্রি লক্ষ্ম্যাদিশক্ত্যষ্টকৈঃ সংয়ুতে মাতৃকামণ্ডলৈর্মণ্ডিতে
যক্ষগন্ধর্বসিদ্ধাঙ্গনা মণ্ডলৈরর্চিতে
ভৈরবী সংবৃতে পঞ্চবাণাত্মিকে পঞ্চবাণেন রত্যা চ
সংভাবিতে প্রীতিভাজা বসন্তেন চানন্দিতে ভক্তিভাজং পরং শ্রেয়সে
কল্পসে যোগিনাং মানসে দ্যোতসে ছন্দসামোজসা ভ্রাজসে গীতবিদ্যা
বিনোদাতি তৃষ্ণেন কৃষ্ণেন সম্পূজ্যসে ভক্তিমচ্চেতসা বেধসা
স্তূয়সে বিশ্বহৃদ্যেন বাদ্যেন বিদ্যাধরৈর্গীয়সে
শ্রবণহরদক্ষিণক্বাণয়া বীণয়া কিন্নরৈর্গীয়সে
যক্ষগন্ধর্বসিদ্ধাঙ্গনা মণ্ডলৈরর্চ্যসে
সর্বসৌভাগ্যবাঞ্ছাবতীভির্ বধূভিস্সুরাণাং সমারাধ্যসে
সর্ববিদ্যাবিশেষত্মকং চাটুগাথা সমুচ্চারণাকণ্ঠমূলোল্লসদ্-
বর্ণরাজিত্রয়ং কোমলশ্যামলোদারপক্ষদ্বয়ং তুণ্ডশোভাতিদূরীভবৎ
কিংশুকং তং শুকং লালয়ন্তী পরিক্রীডসে
পাণিপদ্মদ্বয়েনাক্ষমালামপি স্ফাটিকীং জ্ঞানসারাত্মকং var মালাগুণ
পুস্তকঞ্চঙ্কুশং পাশমাবিভ্রতী তেন সঞ্চিন্ত্যসে তস্য
বক্ত্রান্তরাৎ গদ্যপদ্যাত্মিকা ভারতী নিস্সরেৎ যেন বাধ্বংসনাদা
কৃতির্ভাব্যসে তস্য বশ্যা ভবন্তিস্তিয়ঃ পূরুষাঃ যেন বা
শাতকংবদ্যুতির্ভাব্যসে সোঽপি লক্ষ্মীসহস্রৈঃ পরিক্রীডতে
কিন্ন সিদ্ধ্যেদ্বপুঃ শ্যামলং কোমলং চন্দ্রচূডান্বিতং
তাবকং ধ্যায়তঃ তস্য লীলা সরোবারিধীঃ তস্য কেলীবনং
নন্দনং তস্য ভদ্রাসনং ভূতলং তস্য গীর্দেবতা কিঙ্করি
তস্য চাজ্ঞাকরী শ্রী স্বয়ং
সর্বতীর্থাত্মিকে সর্ব মন্ত্রাত্মিকে
সর্ব যন্ত্রাত্মিকে সর্ব তন্ত্রাত্মিকে
সর্ব চক্রাত্মিকে সর্ব শক্ত্যাত্মিকে
সর্ব পীঠাত্মিকে সর্ব বেদাত্মিকে
সর্ব বিদ্যাত্মিকে সর্ব যোগাত্মিকে
সর্ব বর্ণাত্মিকে সর্বগীতাত্মিকে
সর্ব নাদাত্মিকে সর্ব শব্দাত্মিকে
সর্ব বিশ্বাত্মিকে সর্ব বর্গাত্মিকে
সর্ব সর্বাত্মিকে সর্বগে সর্ব রূপে
জগন্মাতৃকে পাহি মাং পাহি মাং পাহি মাং
দেবি তুভ্যং নমো দেবি তুভ্যং নমো দেবি তুভ্যং নমো
দেবি তুভ্যং নমঃ
॥ ইতি শ্যামলা দণ্ডকম্ সম্পূর্ণম্ ॥
Comments
Post a Comment